4.10 Vorms van kredietaankope en metodes van betaling  (Page 2/2)

Kontantaankope kan gedoen word by enige winkel waar die beste transaksie beding kan word. Jy is dus nie gebind aan ’n spesifieke winkel waar jy ’n rekening het nie.

Krediet is ook altyd duurder omdat rente en administratiewe koste bygevoeg moet word.

Kontantaankope beteken dat jy nie meer sal koop as wat jy kan bekostig nie. Maklike kredietverlening kan veroorsaak dat ’n mens geld uitgee wat jy nie regtig het nie en wanneer dit terugbetaal moet word kan finansiële probleme ontstaan.

Kontantaankope maak die verbruiker geregtig op kontantkorting wat goedkoper aankope meebring.

Bogenoemde voordele toon dus aan dat kontantaankope steeds bestaansreg het in ’n sakewêreld wat grootliks van krediet gebruik maak.

NAVORSINGSOPDRAG:

• Versamel inligting by finansiële instellings en winkels oor die verskillende metodes van betaling wat bestaan.

• Bepaal dan, met redes, watter metodes is die beste vir die volgende persone :

(a) ’n professionele persoon

(b) ’n student

(c) ’n boer

(d) ’n pensioenaris

Assessering

Memorandum

AKTIWITEIT 1

(a) ‘n Professionele persoon – Sulke persone kan op grond van hul professionele status sekere voordele by banke geniet soos ‘n spesiale tjekrekening en ander fasiliteite. Aangesien hierdie persone nie baie tyd het om aan hulle persoonlike geldsake te bestee nie, is ‘n tjekrekening en kredietkaarte, asook elektroniese maniere van betaling, nuttig. In geval van oorsese reise is reisigerstjeks nuttig.

(b) Student – Aangesien studente nie ‘n voltydse inkomste verdien nie, het hulle dikwels spesiale behoeftes wat deur die meeste banke met behulp van spesiale pakkette hanteer word. Kredietkaarte is nuttig indien selfdissipline toegepas word sodat nie te veel op krediet aangekoop word nie. Debietkaarte is nuttig omdat daar nie meer geld gespandeer kan word as wat in die rekening is nie.

(c) Boer – Omdat boere jaarliks die opbrengs van oeste het en gereeld betalings moet doen, is ‘n tjekrekening met oortrokke fasiliteite geskik. ‘n Maandelikse bankstaat en afskrifte van tjeks, of tjekteenblaaie, help om betalings te kontroleer en te beplan. Afstand is gewoonlik ‘n beperkende faktor en dan is tjekbetalings en elektroniese betalings voordelig.

(d) Pensionaris – Dit is gevaarlik vir ouer mense om baie kontant by hulle te dra. Hulle kan eerder gebruik maak van kredietkaarte of debietkaarte om hulle betalings te doen.